Хүн болж хорвоотой танилцсан хэд дэх жилийн зун байсныг санахгүй нь. Хөх сайрын чулуунд хөлөө хатгуулчихаад суун тусахдаа бяцхан омогтоо түүнийг холоо авч шидэн хашрааж билээ. Өөрөөс нь өчнөөн том намайг гишгэхэд хөөрхий тэр чулуу өвдсөн байх даа. 

Нүүдлийн замд задарсан ачааг даруулж ядахдаа замын хажуугийн чулууг ховхолж аваад даруулахад хөөрхий тэр чулуу надад гомдсон байхдаа. Ургаж өндийсөн нутгаас нь урвуулан авч явахад уйлсан байхдаа.

Чулуу уйлдаг юм гэнэ лээ. Цурхиран цурхиран шаналдаг юм гэнэ лээ. Алс холын хүний нутгийг зорих хүүдээ нутгийн чулууг нь боож өгөхдөө аав нь нутгийн үнэр сэтгэлд нь хургаж , нууж урссан чулуун нулимсаар нутагтаа хүүгээ даатгаж , нүд тайлж ухаан суух үед нэгэн зүгт сэтгэлийг нь нутагтаа аргамждаг юм гэнэ лээ.

Чулуу уйлдаг юм гэнэ лээ. Ширгэж хатсан ч голын сайраа санаад бэтгэрч , шингэрч гандсан ч хээрийн салхи илбэсэн талаа санаад мэгшиж , будант буурал уулсаа санаад алсад хараа сунган, бор түүхийн шаргал өдрүүдийг санан санан хоргоддог юм гэнэ лээ.  

Хүний нутгийн чулууг ч хөндөж битгий хөдөлгөөрэй. Харц унагаж шохоорхсон чулуу халаасанд чинь хэдхэн хоноод хаягдах биз. Аль эсвэл ганган хээнцэр тавиур дээр гарч орох нэгний харцанд ганцаардан ганцаардан сүлбүүлэх биз. Ханьсаж ижилссэн олноос нь онцолж түүнийг бүү сонгоорой.

Нутаг нь уйлдаг юм гэнэ лээ чулуугаа санаж. Нуга нугын тэртээд хүйтэн салхиар хүүгэн гомддог юм . Будант тэнгэрээс тунгалаг нулимсаа дуслуулан байж мэлмэрдэг юм. Бууж мордсон нэгнээс ч үг горьдон аниргүйддэг юм.

Бусдын нутагт ирсэн чулуу гурван жил нутгаа санан бэтгэрдэг юм гэсэн. Би мэднээ нутгаа санаж гансарсан сэтгэл минь надад шивнэсэн юм.  Бусдын бууринд хэзээ ч тогтдоггүй юм гэсэн тэд.  Би мэднээ бойжиж өссөн хонхороо санасан зүрх ингэж шивнэсэн юм 

Чулуу уйлдаг юм гэнэ лээ. Чихээрээ , нүдээрээ биш чин зүрхний цохилтоор , санаж бэдэрсэн сэтгэлээр та үүнийг мэдэрнэ . Чагнаад үзээрэй чулуу нутгаа санан уйлдаг юм гэнэ лээ. 

ЛуЗа